जय देवा खंडेराया । निजशिवरुप सखया ॥ आरती ओवाळीतो । भावभंडारसुप्रीया ॥ धृ. ॥ देहत्रय गड थोर । हेचि दुर्घट जेजूर । तेथे तूं नांदतोसी ॥ आत्मसाक्षित्वे निर्धार ॥ उन्मनी म्हाळसा हे । शांतिबाणाई सकुमार । भुक्ति मुक्ति दया क्षमा । मुरळ्या नाचती सुंदर ॥ १ ॥ जय देवा खंडेराया । निजशिवरुप सखया ॥ आरती ओवाळीतो । भावभंडारसुप्रीया ॥ धृ. ॥ स्वानंद अश्व थोर त्यावरि बैसोनि सत्वर ॥ अद्वैतबोध तीव्र । हाती घेउनि तरवार ॥ अहंकार मल्लासूर । त्यातें मारिसी साचार ॥ निवटुनी दैत्यगार । विजयी होसी तूं मल्हार ॥ २ ॥ जय देवा खंडेराया । निजशिवरुप सखया ॥ आरती ओवाळीतो । भावभंडारसुप्रीया ॥ धृ. ॥ निरसोनी द्वैत भाव । करिसी तूं ठाणे अपूर्व । अद्वैतची भक्तदेव ।भेदबुद्धी मिथ्या वाव । तुजवीण न दिसे कोणी । जगिं या एकचि तू धणी ॥ मौनी म्हणे तुची सर्व । अससी व्यापक खंडेराव ॥ ३ ॥ जय देवा खंडेराया । निजशिवरुप सखया ॥ आरती ओवाळीतो । भावभंडारसुप्रीया ॥ धृ. ॥